Home / உள்நாட்டு செய்திகள் / பதவி விலகல் தொடர்பில் முதலமைச்சரே அறிவிக்க வேண்டும்; அனந்தி

பதவி விலகல் தொடர்பில் முதலமைச்சரே அறிவிக்க வேண்டும்; அனந்தி

வடக்கு மாகாண அமைச்சர்களின் பதவி விலகல் தொடர்பாக மாகாண ஆளுநர் எழுத்து மூலம் முதலமைச்சருக்கு அறிவித்தால், பதவியைத் துறப்பது குறித்து பரிசீலனை செய்யப்படும் என்று வடக்கு மாகாண மகளிர் விவகாரம் மற்றும் கூட்டுறவுத்துறை அமைச்சர்  அனந்தி சசிதரன் தெரிவித்தார்

தற்கால நிலமைகள் தொடர்பில் நேற்று மாலை மாகாண மகளிர் விவகார அமைச்சின் அலுவலகத்தில் நடைபெற்ற பத்திரிகையாளர் சந்திப்பின் போது, அவர் இதனைத் தெரிவித்தார்.

மேன்முறையீட்டு நீதிமன்றின் இடைக்காலத் தடை உத்தரவால் வடக்கு மாகாண அமைச்சுக்கள் தொடர்பாக எழுந்துள்ள குழப்பநிலையைத் தீர்ப்பதற்கு அமைச்சர்கள் தாமாக பதவி விலக வேண்டும் என மாகாண ஆளுநர் றெஜினோல்ட் குரே, அண்மையில் நிகழ்வொன்றில் உரையாற்றியிருந்தார்.

இந்த நிலையில் மாகாண அமைச்சர்களின் பதவி விலகல் தொடர்பில் என்ன முடிவுகள் எடுக்கப்பட்டுள்ளன என்று ஊடகவியலாளர்களால் எழுப்பப்பட்ட கேள்விக்குப் பதிலளிக்கையிலேயே மாகாண அமைச்சர் திருமதி அனந்தி சசிதரன் இவ்வாறு தெரிவித்தார்.

அவர் மேலும் தெரிவித்ததாவது:

வடமாகாண ஆளுநர் அமைச்சர்களின் பதவி விலகல் தொடர்பாக இவ்வாறான நிலைப்பாட்டைக் கொண்டிருந்தால், எழுத்து மூலம் முதலமைச்சருக்கு தெரியப்படுத்தினால், அந்த நடவடிக்கைகள் தொடர்பில் பரிசீலிப்பதற்கு ஏதுவாக இருக்கும்.

மாகாண அமைச்சர்களின் பதவி விலகல் தொடர்பாக உத்தியோகபூர்வ அறிவித்தல்கள் எதுவும் முதலமைச்சருக்கோ எமக்கோ கிடைக்கவில்லை.

ஏற்கனவே இருக்கின்ற 5 அமைச்சர்களும், நீதிமன்ற அறிவித்தலின் பின்னர் ஒன்றுகூடவில்லை. ஆனால், டெனீஸ்வரனின் வர்த்தக வாணிப அமைச்சை மீளத்தருமாறு முதலமைச்சர் கோரினால், முதலமைச்சரிடம் நான் மீளக் கையளிப்பேன் – என்றார்.

டெனீஸ்வரனிடம் அமைச்சுப் பதவிகளை கையளித்து விட்டு பதவி விலகத் தயாராக இருக்கின்றீர்களா? ஏன் உறுதியான முடிவுகளை எடுத்து, மாகாண சபையின் நடவடிக்கைகள் முன்னெடுக்க தவறுகிறீர்கள்? என அவரிடம் செய்தியாளர்கள் கேள்வி எழுப்பினர்.

“நீதிமன்ற விடயத்தை விமர்ச்சிக்க முடியாது. அமைச்சர்களுக்கு நீதிமன்றால் அழைப்பு விடுவிக்கப்பட்டுள்ளது. ஆனால் இதுவரையில் எந்த நீதிமன்ற அழைப்பும் எனக்கு கிடைக்கவில்லை. பதவி விலகல் தொடர்பில் முதலமைச்சர் அறிவித்தால், உரிய நடவடிக்கைகள் எடுக்கப்படும்” என்று அனந்தி சசிதரன் தெரிவித்தார்.

About இனியவன்

x

Check Also

ஜனநாயகத்தை பாதுகாப்பதற்கு உயிரையும் கொடுப்பேன்

அச்சுறுத்தல்கள் மற்றும் மிரட்டல்கள் உள்ளிட்ட அனைத்து வகையான சவால்களையும் எதிர்கொண்டு பாராளுமன்றத்தின் ஜனநாயகத்தை பாதுகாப்பதற்கு உயிரைக் கொடுத்தேனும் செயற்படுவேன் என ...

%d bloggers like this: